---
title: "കണ്ണൂരിൽ ഉടമ ഹോട്ടലിൽ ചായ കുടിക്കാൻ പോയ സമയത്ത് കാറിലൊളിച്ച് ഉഗ്രൻ  മൂർഖൻ ; ഓട്ടോ ഡ്രൈവർ കണ്ടത് രക്ഷയായി*"
english_title: "A ferocious cobra hid in a car in Kannur while its owner went to have tea at a hotel; Auto driver saved him by spotting him"
publisher: "panoornews.in"
canonical_url: "https://panoor.truevisionnews.com/news/351735/A ferocious cobra hid in a car in Kannur while its owner went to have tea at a hotel; Auto driver saved him by spotting him"
published_at: "2026-04-05T19:24:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/69d269c7d41b8_1001179685.jpg"
keywords: []
---

# കണ്ണൂരിൽ ഉടമ ഹോട്ടലിൽ ചായ കുടിക്കാൻ പോയ സമയത്ത് കാറിലൊളിച്ച് ഉഗ്രൻ  മൂർഖൻ ; ഓട്ടോ ഡ്രൈവർ കണ്ടത് രക്ഷയായി*

> **Lead Summary:** കണ്ണൂർ താഴെ ചൊവ്വയില്‍ റോഡരികില്‍ നിർത്തിയിട്ട കാറിനുള്ളില്‍ കൂറ്റൻ മൂർഖൻ പാമ്പ് കയറിക്കൂടി. പള്ളിപ്പൊയില്‍ സ്വദേശിയായ മനോജിന്റെ കാറിലാണ് പാമ്പ് കയറിയത്.

## Article Content

കണ്ണൂർ താഴെ ചൊവ്വയില്‍ റോഡരികില്‍ നിർത്തിയിട്ട കാറിനുള്ളില്‍ കൂറ്റൻ മൂർഖൻ പാമ്പ് കയറിക്കൂടി. പള്ളിപ്പൊയില്‍ സ്വദേശിയായ മനോജിന്റെ കാറിലാണ് പാമ്പ് കയറിയത്.

മാർക്ക് പ്രവർത്തകരുടെ നേതൃത്വത്തില്‍ നടന്ന 30 മിനിറ്റ് നീണ്ട സാഹസികമായ പരിശ്രമത്തിനൊടുവിലാണ് പാമ്പിനെ പിടികൂടിയത്.

മനോജ് കാർ റോഡരികില്‍ നിർത്തിയിട്ട് സമീപത്തെ കടയില്‍ ചായ കുടിക്കാൻ പോയ സമയത്താണ് മൂർഖൻ ഇഴഞ്ഞെത്തിയത്. കാറിന്റെ പിൻവശത്തെ ടയറിലൂടെ പാമ്പ് അകത്തേക്ക് കയറുന്നത് അവിടെയുണ്ടായിരുന്ന ഓട്ടോറിക്ഷ തൊഴിലാളികളും ചില നാട്ടുകാരും നേരില്‍ കണ്ടു.

പാമ്പ് ടയറിന് സമീപമുള്ള മാറ്റിനുള്ളിലേക്ക് ഇഴഞ്ഞു കയറിയതോടെ ഇവർ ഉടൻ തന്നെ ഉടമയെ വിവരമറിയിക്കുകയായിരുന്നു. ഉടമ എത്തുന്നതിന് മുൻപ് തന്നെ പാമ്പ് വാഹനത്തിന്റെ ഉള്‍ഭാഗത്തേക്ക് കടന്നിരുന്നെങ്കില്‍ വലിയ അപകടത്തിന് കാരണമാകുമായിരുന്നു.

ഉടൻ തന്നെ മാർക്ക് പ്രവർത്തകനും ഫോറസ്റ്റ് റെസ്‌ക്യൂവറുമായ ജിഷ്ണു പനങ്കാവിനെ വിവരമറിയിച്ചു. ജിഷ്ണുവും മറ്റൊരു മാർക്ക് പ്രവർത്തകനായ സനലും സ്ഥലത്തെത്തി പരിശോധന നടത്തിയെങ്കിലും പാമ്പ് ടയറിന് ഉള്‍വശത്തായി ഒളിച്ചിരിക്കുകയായിരുന്നു. തുടർന്ന് മെക്കാനിക്കല്‍ ഉപകരണങ്ങളുടെ സഹായത്തോടെ കാറിന്റെ പിൻവശത്തെ ടയർ ഊരി മാറ്റി.

ടയറിന് സമീപത്തെ മാറ്റിനുള്ളില്‍ ചുരുണ്ടു കൂടിയിരുന്ന മൂർഖനെ ജിഷ്ണു സാഹസികമായി പിടി കൂടുകയായിരുന്നു. അര മണിക്കൂറോളം നീണ്ട പരിശ്രമത്തിനൊടുവിലാണ് പാമ്പിനെ സുരക്ഷിതമായി പുറത്തെടുത്തത്.

റോഡരികിലെ ചതുപ്പ് പ്രദേശത്ത് നിന്നാണ് മൂർഖൻ കാറിലേക്ക് കയറിയതെന്നാണ് സംശയിക്കുന്നത്. പിടികൂടിയ പാമ്പിനെ പിന്നീട് വനംവകുപ്പിന്റെ നിർദ്ദേശാനുസരണം സുരക്ഷിതമായ ആവാസ വ്യവസ്ഥയില്‍ തുറന്നു വിട്ടു. മഴക്കാലമായതിനാല്‍ വാഹനങ്ങള്‍ നിർത്തിയിടുമ്പോള്‍ ജാഗ്രത പാലിക്കണമെന്ന് റെസ്‌ക്യൂ പ്രവർത്തകർ നിർദ്ദേശിച്ചു.

### Related Links & Sources
- [Original Story Source](https://panoor.truevisionnews.com/news/351735/A ferocious cobra hid in a car in Kannur while its owner went to have tea at a hotel; Auto driver saved him by spotting him)